ހުރިހާ ސިޔާސީ ޕާޓީތައް އެކުލެވޭ އިންތިގާލީ ސަރުކާރެއް އެކުލަވާލުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.

އެކްސްގައި ރައީސް ނަޝީދު ކުރެއްވި ޕޯސްޓެއްގައި ވިދާޅުވީ ކެބިނެޓުގެ މައްޗަށް ރައީސުލްޖުމްހޫރިއްޔާގެ އިތުބާރު ގެއްލިއްޖެ ކަމަށެވެ. އަދި ރައީސުލްޖުމްހޫރިއްޔާ އަށް ރައްޔިތުންގެ އިތުބާރު ގެއްލިފައިވާ ކަމަށެވެ.

އެމަނިކުފާނު ވިދާޅުވީ މި ދަނޑިވަޅުގައި މެދުއިރުމަތީގައި ހިނގަމުން އަންނަ ހަނގުރާމައިގެ އަސަރު ރާއްޖެ އަށް ބޮޑުކޮށް ކުރަން ފަށައިފި ކަމަށެވެ. އެހެންކަމުން ބޭނުން ޖެހިފައިވާ އަސާސީ އޮނިގަނޑުގެ އިސްލާހުތައް ގެނައުމަށާއި މިނިވަން އިންސާފުވެރި އިންތިހާބެއް ރާވާ ހިންގުމަށްޓަކައި ހުރިހާ ސިޔާސީ ޕާޓީއެއް އެކުލެވޭ ސަރުކާރެއް އެކުލަވާލުމަށް ނަޝީދު ވަނީ ގޮވާލައްވައިފައެވެ.

ނަޝީދު މިފަދައިން ވިދާޅުވެފައި މިވަނީ ކުއްލި ގޮތަކަށް ރައީށް ޑރ. މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ 10 ވަޒީރަކު އިސްތިއުފާ ދެއްވުމާއި ގުޅިގެންނެވެ.

ރައީސް އޮފީހުން މިއަދު ބުނީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސުލްޖުމްހޫރިއްޔާ ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެގޮތުން، ކެބިނެޓްގެ 10 ވަޒީރަކު މިއަދު އިސްތިއުފާ ހުށަހަޅުއްވާފައިވާތީ އެ ބޭފުޅުންގެ އިސްތިއުފާ ރައީސުލްޖުމްހޫރިއްޔާ ގަބޫލުފުޅު ކުރައްވާފައިވާ ކަމަށެވެ.