ޖުޑީޝަލް ސާވިސް ކޮމިޝަން (ޖޭއެސްސީ)ގެ ބެލުމުގެ ދަށުގައި ޑިޕާޓުމަންޓު އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އޮތް އޮތުން ބަދަލުކޮށް، ޖުޑީޝަލް ކައުންސިލް އެކުލަވާލުމުގެ ވިސްނުން ގެންގުޅުއްވާ ކަމަށް ރައީސް ޑރ. މުހައްމަދު މުއިއްޒު ހާމަކުރައްވައިފިއެވެ.

ކޮންމެ ހަފްތާއެއްގެ ހޯމަ ދުވަހަކު ރައީސް މުއިއްޒު ނޫސްވެރިންނާއެކު ބާއްވާ ނޫސްވެރިންގެ ބައްދަލުވުމުގައި ވާހަކަދައްކަވަމުން މިއަދު ވިދާޅުވީ ކުރީ ސަރުކާރުން ޝަރުއީ ދާއިރާ އަށް ނުފޫޒު ފޯރުވުމުގެ ގޮތުން ގިނަ ކަންތައްތަކެއް ކޮށްފައިވާ ކަމަށެވެ. އޭގެތެރެއިން ރައީސް ފާހަގަކުރެއްވި އެއް ކަމަކީ ޖުޑީޝަލް އެޑްމިނިސްޓްރޭޓިވްގެ ބާރުތައް ޖޭއެސްސީގެ ދަށަށް ބަދަލު ކުރުމެވެ.

ރައީސްގެ ވާހަކަފުޅުގައި ވިދާޅުވީ ސަރުކާރުގެ ވިސްނުން ހުރީ ޖޭއެސްސީގެ ކޮންޓްރޯލްގެ ދަށުގައި ޑީޖޭއޭ އޮންނަ އޮތުމަށް އިސްލާހު ގެނައުމަށް ކަމަށެވެ.

"އެންމެ ފުރަތަމަ ޖުޑިޝަރީ ގާނޫނު އޮތްއިރުގައި ކޯޓުތަކާ ބެހޭ ގާނޫނުގައި އޮތް ގޮތަށް ބަދަލުކުރަން ވިސްނުން ހުރީ،" ރައީސް މުއިއްޒު ވިދާޅުވިއެވެ.

ރައީސް ވިދާޅުވީ 2011ވަނަ އަހަރާއި ޖެހެންދެން ޖުޑީޝަލް ކައުންސިލެއް އޮތް ކަމަށެވެ. އެ ކައުންސިލަކީ އުއްތަމަ ފަނޑިޔާރާއި ސުޕްރީމް ކޯޓުގެ ހުރިހާ ފަނޑިޔާރުންނާއި ހައި ކޯޓާއި ސުޕީރިއާ ކޯޓުތަކުގެ އިސްފަނޑިޔާރުން ހިމެނޭހެން އޮންނަ ކައުންސިލެކެވެ.

ޖުޑީޝަލް ކައުންސިލް އަލުން އެކުލަވައިލުމަށްޓަކައު ގާނޫނުތަކަށް ގެންނަންޖެހޭ ބަދަލުތައް ގެންނަވާނެ ކަމަށް ރައީސް ވިދާޅުވިއެވެ.