ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ގައި އޮންނަ އުސޫލުތަކާއި ހިލާފަށް އޮޅުވާލައިގެން އަމިއްލަ ފަރާތަކަށް ބިމެއް ދޭނެ ކަމަށް ބުނެ މަންފާއެއް ހޯދުމަށް އެކުންފުނީގެ މުވައްޒަފަކު މަސައްކަތް ކުރާކަން އެނގުނު ހިސާބުން އެ މައްސަލަ ބަލާ، އެ މުވައްޒަފު ސަސްޕެންޑު ކޮށްފައި ވާނެ ކަމަށް އެ ކުންފުނިން ބުނެފިއެވެ.

މީޑިއާތަކުގައި ދެކެވުން އަންނަ ވާހަކަތަކުގެ ހަގީގަތް ހާމަ ކުރުމުގެ ގޮތުން އެޗްޑީސީ އިން މިއަދު ނެރެފައިވާ ނޫސް ބަޔާނެއްގައި ބުނީ ކަސްޓަމަރަށް އޮޅުވާލައިގެން އެ މުވައްޒަފުގެ އަމިއްލަ އެކައުންޓަށް ފައިސާ ޖަމާ ކޮށްފައިވާކަން އެ ކުންފުނިން ބެލި ބެލުމުން ފާހަގަ ކުރެވިފައިވާ ކަމަށެވެ.

އެ ކުންފުނިން ކުރާ އެއްވެސް މުއާމަލާތެއްގައި މުވައްޒަފެއްގެ އަމިއްލަ އެކައުންޓަށް ފައިސާ ޖަމާ ކުރުމަކީ އެކުންފުނިން ކުރާނެ އަދި ކުރަމުން އަންނަ ކަމެއް ނޫން ކަމަށްވެސް އެޗްޑީސީ އިން ބުނެއެވެ. އެހެންކަމުން އެފަދަ ކަންކަމަށް ސަމާލުވުމަށް އާއްމުންނަށް ވެސް އެޗްޑީސީ އިން ވަނީ އިލްތިމާސް ކޮށްފައެވެ.

ބައެއް މީޑިއާތަކުގައި އެ ބިން ވިއްކަން މަސައްކަތްކުރި މުވައްޒަފު އެއް މިލިއަން ރުފިޔާ ނެގި ކަމަށް ބުނާ ވާހަކަ އެޗްޑީސީ އިން ވަނީ ދޮގު ކޮށްފައެވެ. އަދި ބުނީ އެ ކުންފުނީގެ އުސޫލުތަކުގެ ތެރެއިން އެއްވެސް ބިމެއް ވިއްކުމުގެ ފުރުސަތު އެ މުވައްޒަފަށް ލިބިފައި ނުވާނެ ކަމަށެވެ.

އެޗްޑީސީ އިން ބުނީ އާއްމުކޮށް ހުޅުވާލައިގެން ގެޒެޓުގައި އިއުލާންކުރުމަކާ ނުލާ، އަދި އެޗްޑީސީގެ ބިޑް ޕޯޓަލްގައި ރެޖިސްޓާ ނުވާ އެއްވެސް ފަރާތަކަށް ބިމެއް ނުވިއްކާނެ ކަމަށާއި އަދި ބިން ވިއްކުމަށް ހުޅުވާ ވެސް ނުލާނެ ކަމަށެވެ.

އެފަދަ އަމަލުތައް ހިންގުމަކީ އެކުންފުނިން ހަރުކަށި އިބާރާތުން ކުށްވެރި ކުރާ އަމަލުތައް ކަމަށާއި އެފަދަ އަމަލުތައް ހިންގާ ފަރާތްތަކާއި މެދު ވަގުތުން ފިޔަވަޅު އަޅާނެ ކަމަށްވެސް އެޗްޑީސީ އިން ބުނެއެވެ.