މީގެ 56 އަހަރު ކުރިން، އިޒުރޭލު އޮތް ސައިޒަށް ކުޑަކޮށް، ފަލަސްތީނުގެ ބިންތަކުން އެ މީހުން ފަހަތަށް ޖައްސާލުމަށް އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ބައްދަލުވުމެއްގައި ރާއްޖެއިން ގޮވާލައިފިއެވެ.

ފޮރިން މިނިސްޓްރީން ބުނީ އޯއައިސީގެ މައި މަރުކަޒުގައި އިއްޔެ ބޭއްވި އެ ޖަމުޢިއްޔާގެ އެގްޒެކެޓިވް ކޮމިޓީގެ ބައްދަލުވުމުގައި އެގޮތަށް ގޮވާލެއްވީ ރާއްޖޭގެ ފަރާތުން ސައުދީ އަރަބިއްޔާއަށް ކަނޑައަޅުއްވާފައި ހުންނަވާ ސަފީރު މުޙައްމަދު ޚަލީލެވެ. ރާއްޖޭގެ ފަރާތުން ތަގުރީރުކޮށް، އޭނާ ވާހަކަ ދެއްކެވި ބައްދަލުވުމަކީ އޯއައިސީގައި ގްޒެކެޓިވް ކޮމިޓީގެ އޯޕަން-އެންޑެޑް ކުއްލި ބައްދަލުވުމެކެވެ.

އެ ބައްދަލުވުމުގައި ސަފީރު މުޙައްމަދު ޚަލީލު ވިދާޅުވީ ފަލަސްތީނުގެ މިނިވަން ދައުލަތެއް ޤާއިމްކޮށް، 1967 ވަނަ އަހަރުގެ ކުރީގެ ބޯޑަރާ ހިސާބަށް އިސްރާއީލުން ފަހަތަށް ޖައްސަންޖެހޭ ކަމަށާއި ފަލަސްތީނުގެ ދައުލަތުގެ ވެރިރަށުގެ ގޮތުގައި އިރުމަތީ ޤުދުސް އޮންނަން ޖެހޭ ކަމަށެވެ.

"އެމަނިކުފާނުގެ ތަޤްރީރުގައި އެ އަމަލުތަކަކީ އ.ދ.ގެ ސަލާމަތީ މަޖިލީހާއި ޢާއްމު މަޖިލީހުގެ ޤަރާރުތަކާ ޚިލާފު އަމަލުތަކެއްކަން ބަޔާންކޮށް، އެ ޢަމަލުތައް ހަރުކަށި އިބާރާތުން ކުށްވެރިކުރެއްވިއެވެ. ހަމައެއާއެކު އިސްރާއީލުން ގާޒާގައި ޤަވައިދާ ޚިލާފަށް ހިންގަމުންދާ އަމަލުތައް ހުއްޓުވުމަށްވެސް ގޮވާލެއްވިއެވެ،" ފޮރިން މިނިސްޓްރީން ބުންޏެވެ.

ފޮރިން މިނިސްޓްރީން ބުނީ އެމަނިކުފާނުގެ ތަޤްރީރުގައި ދިވެހި ސަރުކާރާއި ރައްޔިތުން އަބަދުމެހެން ފަލަސްތީނުގެ ރައްޔިތުންނާ އެކު ވާނެ ކަމަށެވެ.