ފަނޑިޔާރުންގެ ސުލޫކީ މިންގަނޑާއި ނަޒާހާތްތެރިކަން އެންމެ މަތީ ދަރަޖާގައި ހިފެހެއްޓުމުގެ ޒިންމާ މަތިކޮށްފައިވާ ޖުޑިޝަލް ސާވިސް ކޮމިޝަން، (ޖޭއެސްސީ)ގެ މެމްބަރުންގެ އަދަދު ހަތަކަށް ތިރިކޮށް، "ސިޔާސީ" ބައެއް ބޭފުޅުން އެ ކޮމިޝަންގައި ނުހިމެނޭ ގޮތަށް އިސްލާހު ހުށަހަޅައިފިއެވެ.

ޖޭއެސްސީގައި މިހާރު ތިއްބަވަނީ 10 މެމްބަރުންނެވެ. އެ ކޮމިޝަން އިސްލާހު ކުރުމަކީ މި ސަރުކާރުގެ ރިޔާސީ ވައުދެކެވެ.

ބަންޑާރަނައިބު އިބްރާހިމް ރިފްއަތު މިއަދު ކުރެއްވި ޓްވީޓެއްގައި ވިދާޅުވީ ޖޭއެސްސީ އިސްލާހު ކުރުމަށްޓަކާ ޤާނޫނުއަސާސީއަށާއި ޤާނޫނަށް ގެންނަންޖެހޭ އިޞްލާޙުތައް އެކުލެވޭ ދެ ބިލެއް މަޖިލީހަށް މިއަދު ފޮނުވާފައިވާނެ ކަމަށެވެ. އެގޮތުން، މަޖިލީހަށް ހުށަހަޅާ މައިގަނޑު ބަދަލަކީ ޖޭއެސްސީގައި ރައީސުލްޖުމްހޫރިއްޔާގެ މެންބަރާއި، ރައްޔިތުންގެ މަޖިލީހުގެ ރައީސާއި، ސިވިލް ސަރވިސް ކޮމިޝަންގެ ރައީސް އެ ކޮމިޝަނުގައި ނުހިމެނޭ ގޮތަށް ހުށަހެޅުން ކަމަށް ރިފްއަތު ވިދާޅުވިއެވެ.

"އެގޮތަށް ހުށަހެޅީ ޝަރުޢީ ދާއިރާގެ މައްޗަށް ދައުލަތުގެ އެހެން ބާރުތަކުން ނުފޫޒު ފޯރުވުން ހުއްޓުވުމަށާއި މިކަންކުރަން އެންމެ އެކަށޭނެ ގޮތެއް ހޯދުމަށް ޝަރުޢީ ދާއިރާއާއި އެނޫންވެސް ފަރާތްތަކާއި ޤާނޫނީ ފަންނުގެ ދާއިރާއާއި މަދަނީ ޖަމްޢިއްޔާތަކާއި ޢާންމުންގެ ޚިޔާލާއި މަަޝްވަރާގެ އަލީގަ،" ރިފްއަތު ވިދާޅުވިއެވެ.

ޖޭއެސްސީ އެކުލެވިގެން ވަނީ ރައްޔިތުންގެ މަޖިލީހުގެ ރައީސާއި، ސުޕްރިމްކޯޓުގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އުއްތަމަފަނޑިޔާރު ފިޔަވައި އެކޯޓުން އިންތިޚާބުކުރައްވާ ފަނޑިޔާރަކާއި، ހައިކޯޓުގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އެކޯޓުން އިންތިޚާބުކުރައްވާ ފަނޑިޔާރަކާއި، ދަށުކޯޓުތަކުގެ ފަނޑިޔާރުންގެ ތެރެއިން، އެކޯޓުތަކުން އިންތިޚާބު ކުރައްވާ ފަނޑިޔާރަކާއި، ރައްޔިތުންގެ މަޖިލީހުގެ މެންބަރުންގެ ތެރެއިން އެމަޖިލީހުން ކަނޑައަޅުއްވާ މެންބަރަކާއި، އާންމުންގެ ތެރެއިން، ރައްޔިތުންގެ މަޖިލީހުން ކަނޑައަޅުއްވާ ބޭފުޅަކާއި، ސިވިލްސަރވިސް ކޮމިޝަނުގެ ރައީސާއި، ރައީސުލްޖުމްހުރިއްޔާ ޢައްޔަން ކުރައްވާ ބޭފުޅަކާއި ދަޢުލަތުގެ ބަންޑާރަނައިބުގެ އިތުރުން ދިވެހިރާއްޖޭގައި ޤާނޫނީ ވަކީލުކަން ކުރެއްވުމުގެ ހުއްދަލިބިވަޑައިގެންފައިވާ ވަކީލުންގެ ތެރެއިން، އެބޭފުޅުން އިންތިޚާބުކުރައްވާ ވަކީލެއްގެ މައްޗަށެވެ.

އޭޖީ ވިދާޅުވީ ޝަރުޢީ ދާއިރާ އިޞްލާޙުކުރުމަކީ އިޖުތިމާޢީ ޢަދުލުވެރިކަމުގެ ދާއިރާއިން އަދުގެ ސަރުކާރުން ވެފައިވާ އެންމެ މުހިންމު އެއް ވަޢުދު ކަމަށެވެ.

"މި މަސައްކަތް 2019 ގައި ފަށާފައި. މިހާތަނަށް ކަމާގުޅޭ 9 ބިލެއް މަޖިލީހަށްވަނީ ހުށަހަޅާފަ. މިއަދުގެ 2 ބިލާއެކު މިއިޞްލާޙީ މަސައްކަތް ފުރިހަމަކުރެވިއްޖެ،" ބަންޑާރަނައިބު ވިދާޅުވިއެވެ.