އަންހެން ފުލުހަކަށް ގެވެށި އަނިޔާކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ވަނީ އަންހެން ފުލުހަކަށް ގެވެށި އަނިޔާކުރި މައްސަލައެއް ހުށަހެޅުމާ ގުޅިގެން އެމައްސަލަ ދިވެހި ފުލުހުންގެ ހިދުމަތުން ތަހުގީގު ކުރަމުން އަންނަ ކަމަށެވެ.

ފުލުހުން އިތުރަށް ބުނީ އެ މައްސަލަ ތަހުގީގުކުރުމުގެ ތެރެއިން ލިބިފައިވާ މައުލޫމާތުގެ އަލީގައި ޕްރޮފެޝަނަލް ސްޓޭޏްޑަޑްސް ކޮމާންޑުން ވެސް ތަހުގީގެއް ހިންގަމުން އަންނަ ކަމަށެވެ.

އެ މައްސަލަ އެންމެ ފުރަތަމަ ރިޕޯޓުކޮށްފައި ވަނީ އޮންލައިން ނޫސް "ދިޔަރެސް" އިންނެވެ. ފުލުހުންގެ މެސެޖުގައި އެ ނޫހުން ޝާއިއުކޮށްފައިވާ ހަބަރަކީ، އެކަމާ ގުޅޭގޮތުން ފުލުހުންގެ މައުލޫމާތު އޮޅުންފިލުވުމަށް އެއްވެސް މަސައްކަތެއް ނުކޮށް، ލިޔެފައިވާ ދޮގު ހަބަރެއް ކަމަށް ބުނެފައިވެއެވެ.

ދިވެހި ފުލުހުންގެ ހިދުމަތުގެ މުވައްޒަފުންގެ ޕްރޮފެޝަނަލް ކޮންޑަކްޓު ކަށަވަރުމުރުމަށް ގާނޫނުތަކުން ތަފާތު އިންތިޒާމުތައް ހަމަޖެހިފައިވާ ހިނދު، އެނިޒާމުތަކާ މެދު ރައްޔިތުންގެ އިތުބާރުގެއްލޭގޮތަށް، ޒިންމާދާރުކަމެއް ނެތި އަދި މައުލޫމާތުގެ ސައްހަކަން ބެލުމަށް އެއްވެސް މަސައްކަތެއް ނުކޮށް މިފަދަ ހައްސާސް ކަންކަމުގައި ހަގީގަތާ ހިލާފު މައުލޫމާތު ހާމަކުރުމަކީ ކަންބޮޑުވާ ކަމެއް ކަމަށްވެސް ފުލުހުން ބުނެފައިވެއެވެ.